Göyçay rayonunda əhalinin siyahıyaalınmasının yüksək səviyyədə təşkil edilməsi üçün nəzərdə tutulmuş hazırlıq işləri başa çatdırılmışdır.Rayon statistika idarəsindən bildirmişlər ki, bu məqsədlə əhalinin siyahıyaalınmasına yardım komissiyası yaradılmış, Göyçay şəhər və kəndlərin sərhədləri dəqiqləşdirilmişdir. Əhalisi 5 min nəfərdən çox olan Bığır və Ləkçiplaq kəndlərinin, eləcə də Göyçay şəhərinin sxematik planı hazırlanmışdır. Şəhərdə küçə adları və ünvanlar səliqəyə salınmışdır.
Bundan əlavə, əhalinin daimi yaşayış yeri üzrə uçot və qeydiyyatını dəqiqləşdirmək məqsədilə Göyçay şəhərində 7300 mənzildə və 25 kənddə yoxlama işləri aparılmışdır. Tədbirlər planına uyğun olaraq, rayonda 7 siyahıyaalma məntəqəsi, 49 təlimatçı-nəzarətçi məntəqəsi, 245 sayıcı məntəqəsi yaradılmışdır. Siyahıyaalma və təlimatçı-nəzarətçi məntəqələrinin dislokasiyası hazırlanmış və məlumatlar rayon qəzetində dərc edilmişdir. Butün məntəqələr müvafiq binalarla təmin edilmişdir.
Aprelin 13-dən başlayaraq on gün müddətində keçiriləcək siyahıyaalma ilə bağlı sayıcı və təlimatçı-nəzarətçilər müəyyənləşdirilərək qeydiyyata alınmışlar. Ehtiyat kadrlar da nəzərdə tutulmuşdur. Əhalini siyahıya alacaq şəxslərin əksəriyyəti 1999-cu ilin siyahıyaalınmasında iştirak etmişlər və bu işdə müəyyən təcrübəyə malikdirlər. Siyahıyaalınma kampaniyası ərəfəsində məntəqə müdirləri, müavinlər, sayıcılar, təlimatçı-nəzarətçilər müvafiq qaydada təlimatlandırılmışlar.
AzərTAc